Құқық қорғау органдарының мәліметінше, мерген 9 қараша күні таңғы 04:30 шамасында көз жұмған. Полициямен болған атыстан кейін ол өте ауыр жағдайда ауруханаға түсіп, бірнеше ота жасатқан болатын. Польша прокуратурасы бұл шабуылды ресми түрде террористік сипаттағы қылмыс ретінде қарастыруда.
Краковтағы қайғылы оқиға 7 қараша күні сағат 15:00 шамасында болды. Әскери киім мен броньды кеудеше киген ер адам Бас нарық алаңына көлікпен басып кіріп, AR-15 типті жартылай автоматты винтовка мен тапаншадан бейберекет оқ жаудырған. Оқиға орнында төрт әйел мен екі ер адам (Польша, Ұлыбритания және Аустрия азаматтары) мерт болды. Тағы 15 жүргінші және екі тәртіп сақшысы жарақат алды.
Кейінірек сұмдық жайттар белгілі болды: Краковтағы қырғынға дейін Оксиньский өзінің ата-анасы мен қарындасын өлтірген. Островец-Свентокшиский қаласындағы пәтерден полиция оның 53 жастағы әкесінің, 52 жастағы анасының және 21 жастағы қарындасының оқ тиген мәйіттерін тапты.
Оксиньскийдің токарь болып жұмыс істегені, бұрын сотталмағаны және әскерде қызмет етпегені белгілі. Ол әкесімен бірге Świt атыс клубына үнемі барып тұрған. Шабуылшының екі қаруға, ал әкесінің тоғыз қаруға ресми рұқсаты болған. Тергеушілер сараптама жүргізу үшін барлық арсенал мен оқ-дәрілерді тәркіледі.
Қылмыстың нақты себебі анықталуда, алайда поляк билігі мергеннің радикалды ультраұлтшыл көзқараста болғанын атап өтті. Қазір тергеушілер оның сыбайластарының бар-жоғын анықтау үшін техникасы мен жазбаларын тексеруде. Ресми мәліметтерге сәйкес, қаза тапқандар мен зардап шеккендер арасында қазақстандықтар жоқ.
