Спортшыларды марапаттау салтанатында сөз сөйлеген Президент, басына түскен өмірлік сынақтарға қарамастан, Айсұлудың әрдайым алға ұмтылып, көпке үлгі болып жүргенін атап өтті. Бүгінде Сүлейменова «Әділет» партиясы фракциясының мүшесі ретінде спорттық мансабын Құрылтайдағы жауапты жұмыспен сәтті қатар алып жүр.
«Қазақтың мақалында: “Күш – білекте емес, жүректе” делінген. Шын мәнінде, асқақ арман мен қайсар мінез ұштасқанда, алынбайтын қамал жоқ», — деді Қасым-Жомарт Тоқаев.
Мемлекет басшысы параспортшылардың қажыр-қайратын жеке атап өтіп, соңғы бес жылда Қазақстанда спортты дамытуға 616 млрд теңгеден астам қаражат бөлінгенін мәлімдеді.
Еске салайық, бұған дейін SHYNDYK.KZ редакциясы Айсұлу Сүлейменовамен эксклюзивті сұхбат жазған болатын. Ашық әңгіме барысында рекордшы үлкен спорттағы жолы туралы айтып қана қоймай, Қазақстандағы мүгедектігі бар адамдардың күнделікті бетпе-бет келетін өзекті мәселелерін көтерген еді.
