Үкімет отырысында ҚР Энергетика министрі Ерлан Ақкенженовтің мәлімдеуінше, энергокәсіпорындардың қоймаларында 5,8 млн тонна көмір мен 137 мың тонна мазут жинақталған. Халық пен коммуналдық-тұрмыстық сектордың қатты отынға деген жалпы қажеттілігі биылғы маусымда 7,3 млн тоннаны құрайды.
Бүгінгі таңда өңірлерде 4,5 млн тонна көмір (жоспардың 62%-ы) дайындалды. Отын жеткізуді үйлестіру үшін ведомство жанынан арнайы Республикалық штаб жұмыс істеуде. Бұдан бөлек, қыркүйек айынан бастап бекітілген 255 мың тонна көлеміндегі әлеуметтік мазутты жөнелту жалғасуда.
Энергетика министрлігінің басшысы инфрақұрылымды қысқа дайындау қорытындылары туралы да баяндады. Министрдің айтуынша, жөндеу науқанын қаржыландыру орта есеппен 27%-ға артқан. Еліміздің электр станцияларында сегіз энергоблок, 49 қазандық және 37 турбина жөнделді. Ауқымды жұмыстар 17,1 мың шақырым электр беру желісін, 444 қосалқы станцияны және 377 шақырым жылу желісін қамтыды.
Қабылданған шаралардың нәтижесінде электр станциялары жабдықтарының тозу деңгейі 52%-ға, электр желілерінің тозуы 65,7%-ға, жылу желілерінікі 48%-ға дейін төмендеді. Желілердегі технологиялық бұзушылықтар саны өткен жылмен салыстырғанда 6%-ға азайған. Генерация көрсеткіштері де өсті: биылғы жылдың он айында Қазақстанда 102 млрд кВт·сағ электр энергиясы өндірілді, бұл өткен жылғы көлемнен 2,3%-ға артық.
SHYNDYK.KZ редакциясы шалғай ауылдық округтердегі жылыту маусымының барысы туралы қосымша мәліметтер алу үшін ҚР Энергетика министрлігіне ресми сауалнама жолдады, жауап күтеміз.
