Лайла Кежебаеваның сөзінше, екі қыз тұрғын үйдің кіреберісіне бірге кіріп, лифтпен оныншы қабатқа көтерілген. Сол сәтте олардың бірі қатты күйзеліп, басын төмен салып, жылап бара жатқан.
Бейнежазбада қыздардың бірінің екіншісіне бір парақ қағаз бергені де байқалған. Оның хат болуы мүмкін, алайда қағазда не жазылғаны белгісіз.
МИБ төрайымы бейнебақылау камераларындағы уақытты салыстырып, қыздар балконда шамамен бір жарым сағат болған деген қорытындыға келген. Дегенмен ол осы уақыт аралығында олардың нақты не істегенін көрмегенін, сондықтан оқиғаның мән-жайы туралы кесіп айтуға болмайтынын атап өтті.
Лайла Кежебаева бұған дейін оқушылардың бірінің әжесімен сөйлескенін де жеткізді. Әжесінің айтуынша, отбасы Лесная Поляна елді мекенінен көшіп келген, ал қыздың анасы жұмыс істеу үшін шетелге кеткен.
МИБ төрайымы оқушылардың буллингке немесе басқа да қиындықтарға тап болуы мүмкін екенін жоққа шығармайды. Алайда мұны растайтын нақты деректер әзірге жоқ.
Оның пікірінше, жасөспірімдер өздерін мазалаған мәселелерді жақындарына әрдайым ашық айта бермейді. Сондықтан балалар кез келген уақытта көмек сұрай алатын қолжетімді психологиялық қолдау орталықтарын ашу қажет.
SHYNDYK.KZ редакциясы Қазақстан Республикасының Оқу-ағарту министрлігіне ресми сауал жолдап, оқиғаға қатысты түсініктеме беруді және қыздардың буллингке ұшырағаны жөнінде қандай да бір мәлімет бар-жоғын хабарлауды сұрады. Материал жарияланған сәтте министрліктен жауап түскен жоқ.
Еске салайық, 9 қарашада Астанадағы тұрғын үйлердің бірінде екі оқушы қыз қаза тапты. Аталған дерек бойынша полиция қылмыстық іс қозғады. Қайғылы оқиғаның мән-жайы анықталып жатыр.
