Үкіметте өткен брифинг барысында Энергетика министрлігінің басшысынан Теңіз бойынша келісімді 2033 жылдан кейін ұзарту перспективалары және қазіргі уақытта талқыланып жатқан ұсыныстар туралы сұралды. Ерлан Ақкенженов тараптар талқылаудың белсенді кезеңінде екенін және пікір алмасуды жалғастырып жатқанын айтумен ғана шектелді.
Министр келіссөздердің коммерциялық сипатын алға тартып, нақты ақпарат беруден бас тартты. «Нәтижелер туралы қандай да бір келісімдерге қол жеткізгеннен кейін айту керек. Бүгінгі таңда ешқандай келісім жоқ», — деп баса айтты ол.
Айта кетейік, Энергетика министрінің бұл тақырып бойынша толыққанды түсініктеме беруден қашқақтауы бірінші рет емес. Өткен брифингте журналистер одан беделді батыс басылымдарының хабарламаларына қатысты жауап алуға тырысқан болатын. Еске салайық, бұған дейін шетелдік БАҚ Қазақстан инвесторлардан 10 миллиард доллар көлемінде бонус алудан дәмелі екенін және жобадағы мемлекет үлесін қазіргі 20%-дан 35%-ға дейін арттыруды көздеп отырғанын жазған еді. Алайда бұл мәліметтер сол күйі ресми расталмады да, теріске шығарылмады да.
