Кэндис Оуэнс өзінің бірнеше подкастында Брижит Макронның ер адам болып дүниеге келгенін және бұрын Жан-Мишель Троньё есімімен жүргенін мәлімдеген. Алайда бұл есім шын мәнінде Брижит Макронның туған ағасына тиесілі.
Сонымен қатар америкалық жүргізуші Эмманюэль Макронның саяси мансабын АҚШ Орталық барлау басқармасының (ЦРУ) адам санасын басқаруға бағытталған құпия бағдарламасымен байланыстыратын қастандық теориясын таратқан.
Макрондардың адвокаттары бұл мәлімдемелердің шындыққа жанаспайтынын, ерлі-зайыптылардың беделіне нұқсан келтіріп, интернеттегі жаппай қудалауға түрткі болғанын алға тартады.
Заңгерлердің айтуынша, Оуэнс аталған қауесеттерді тарату арқылы қаржылық пайда да тауып отыр. Ол осы тақырыпқа қатысты тауарлар сатып, аудиториясынан қайырымдылық қаражатын жинаған.
Макрон мен оның жұбайы сот арқылы ақшалай өтемақы өндіріп алуды және даулы мәлімдемелерді одан әрі таратуды тоқтатуды талап етеді.
Енді тараптардың уәждерін сот қарап, түпкілікті шешім қабылдауы тиіс.
