Қордың мәліметінше, сотта тараптардың жарыссөзі өткен. Ұйым өкілдері мемлекеттік айыптаушы сұраған жаза мерзіміне алаңдаушылық білдірді.
Қор өкілдері мұндай жаза сұрауға айыпталушылардың кәмелетке толмағаны және қолданыстағы рақымшылық заңы әсер етуі мүмкін деп болжайды. Алайда прокуратураның бұл ұстанымына қатысты ресми түсініктеме әзірге жоқ.
Оқиға туралы 2025 жылдың мамырында белгілі болған. Жәбірленушінің әкесінің айтуынша, қылмыс сол жылдың ақпан айында жасалған.
14 ақпанда 16 жастағы студент бұрынғы курстас қызымен бірге «Инфинити» түнгі клубына барған. Кейін ол бейтаныс пәтерге тап болған. Отбасының мәлімдеуінше, сол жерде қыз топтық жыныстық зорлық-зомбылыққа ұшыраған.
Ата-анасы болған жағдайды WhatsApp желісінде тараған бейнежазбадан кейін білген. Видеода қыздың ес-түссіз, киімсіз жатқан сәті түсірілген.
Әкесінің айтуынша, қылмысқа кәмелетке толмаған бес жасөспірімнің қатысы бар. Жәбірленуші күдіктілер тарапынан қорқыту мен қоқан-лоқы болғанын да айтқан.
Бастапқыда үш күдікті қамауға алынған. Алайда алты айдан кейін тергеу изоляторында ұстаудың шекті мерзімі аяқталуына байланысты олар босатылған. Қалған екі күдікті де бостандықта жүрген.
Қазір сот процесі аяқталуға жақын. «НеМолчи» қоры соттан барлық дәлелді жан-жақты қарап, қылмыстың ауырлығына сай әділ жаза тағайындауды сұрады.
Іс бойынша түпкілікті үкім әлі шыққан жоқ.
