10 қарашада әлеуметтік желілерде ескерткішті бөлшектеу жұмыстары түсірілген бейнежазбалар тарады. Кадрлардан жұмысшылардың мүсіннің жоғарғы бөлігін алып тастағанын көруге болады. Ескерткіш орналасқан Жамақаев көшесіндегі саябақ аумағы уақытша қоршалған.
Қалалық тұрғын үй-коммуналдық шаруашылық бөлімінің мәліметінше, ескерткіштің техникалық жағдайы тұрғындардың шағымынан кейін тексерілген.
Тексеру барысында мамандар мүсінде терең жарықтар пайда болғанын, тірек құрылымдарының зақымданғанын және металл бөліктерін тот басқанын анықтаған. Сараптама қорытындысы бойынша ескерткіштің жекелеген бөліктері құлап, адамдардың өміріне қауіп төндіруі мүмкін.
Ленин ескерткіші 1977 жылы Қазан төңкерісінің 60 жылдығына орай қаланың орталық алаңына орнатылған. Кейін мүсін кеңестік қайраткерлердің бюсттері орналасқан аллеяға көшірілген.
2023 жылы аллеядағы бюсттер алынып тасталды. Содан бері Ленин мүсіні сол аумақтағы жалғыз ескерткіш болып қалған.
Бөлшектеу жұмыстары аяқталғаннан кейін мүсінді қалалық тұрғын үй-коммуналдық шаруашылық бөлімінің базасына уақытша орналастыру жоспарланып отыр.
Ескерткіштің бұдан арғы тағдыры әзірге белгісіз. Семей әкімдігі мүсіннің қайта қалпына келтірілетіні, басқа жерге көшірілетіні немесе біржола алынып тасталатыны туралы нақты шешім жариялаған жоқ.
