Қайғылы оқиға Алматы әуежайының құрылыс жұмыстары жүріп жатқан перрон бөлігінде болған. Қаза тапқан азамат осы жұмыстарды атқарып жатқан мердігер ұйымның қызметкері екені анықталды.
Әуежайдың баспасөз қызметі оқиғаны растап, тергеу органдарына қажетті көмек көрсетіліп жатқанын мәлімдеді.
Әуежай әкімшілігі марқұмның отбасы мен жақындарына көңіл айтты.
Бұған дейін Көліктегі полиция департаменті адам өліміне әкелген еңбекті қорғау қағидаларын бұзу дерегі бойынша қылмыстық іс қозғалғанын хабарлаған болатын.
Қазір тергеу амалдары жүргізіліп жатыр. Құқық қорғау органдары оқиғаның барлық мән-жайын анықтауда. Тергеу мүддесіне байланысты өзге мәліметтер әзірге жарияланбайды.
Жұмысшының нақты қандай жағдайда қаза тапқаны, қандай құрылыс жұмыстарын атқарғаны және еңбек қауіпсіздігі талаптарының сақталған-сақталмағаны әзірге белгісіз.
