Алматының Алатау ауданында ерекше оқиға болды. Екі ер адам интернеттен интимдік қызмет ұсынған қыздың хабарландыруын көріп, онымен үшеулеп кездесуге келіскен.
Ер адамдардың айтуынша, олар аудандағы қонақүйлердің бірінде кездесуге уағдаласып, қызға алдын ала ақша берген.
Алайда ақшаны алған бойжеткен шаруасы шығып қалғанын айтып, сәл күте тұруларын сұраған. Сөйтіп, сыртқа шығып кеткен қыз сол күйі оралмаған.
Күткен қыздары келмеген соң, екі ер адам оны өздері іздеуге кіріскен.
Көп ұзамай бойжеткенді азық-түлік дүкендерінің бірінен тауып алған. Осыдан кейін ақшасын қайтарғысы келген ер адамдар полицияға хабарласқан.
Осылайша, үшеулеп көңіл көтермек болғандардың жоспары жүзеге аспай, бәрі аудандық полиция басқармасынан бір-ақ шыққан.
Алматы қалалық полиция департаменті оқиғаның мән-жайы анықталып жатқанын мәлімдеді.
Әзірге қызға нақты қанша ақша берілгені және аталған жағдайға байланысты қандай да бір іс қозғалғаны белгісіз.
