Қазақстанның Бас прокуратурасы Грузиядан трансұлттық ұйымдасқан қылмыстық топқа қатысу және жеңгетайлық жасау күдігіне ілінген Өзбекстан азаматының экстрадицияланғанын мәлімдеді.
Тергеу мәліметінше, қылмыстық топ мүшелері Kyzdar.net интернет-ресурсы арқылы табыс табу схемасын ұйымдастырған. Аталған сайтта ақылы интимдік қызмет көрсететін әйелдердің анкеталары орналастырылған.
Күдіктілер сайт пайдаланушыларының шоттарын толықтыруға арналған өтінімдерді қабылдап, түскен қаражаттың белгілі бір бөлігін комиссия ретінде алып отырған. Қалған ақшаны интернет-платформаның ұйымдастырушыларына аударған.
Осылайша, тергеу нұсқасы бойынша, қылмыстық топ мүшелері интимдік қызметтер жарнамаланатын сайттың қаржылық жұмысын қамтамасыз етіп, одан пайда көрген.
Бұл іс бойынша қылмыстық топтың бірнеше мүшесі бұған дейін әртүрлі мерзімге бас бостандығынан айырылған. Алайда кейбір күдіктілер, соның ішінде Өзбекстан азаматы, тергеуден бой тасалап, халықаралық іздеуге жарияланған.
Биыл шілде айында әйел Грузия аумағында ұсталды. Қазақстан Бас прокуратурасының сұрауы негізінде ол қылмыстық жауапкершілікке тарту үшін елімізге экстрадицияланды.
Қазіргі уақытта күдікті тергеу изоляторында қамауда отыр. Оған тағылған айыптар бойынша мүлкін тәркілей отырып, 10 жылға дейін бас бостандығынан айыру жазасы қарастырылған.
Күдіктінің кінәсі мен жазасына қатысты түпкілікті шешімді сот қабылдайды.
