14 қарашада Зеренді ауданына қарасты Елікті ауылының маңында К-700 маркалы ауыр трактор аударылған. Салдарынан жүргізуші көп тонналық техниканың астында қалып, алған жарақаттарынан оқиға орнында қаза тапты.
Ақмола облысының Полиция департаменті жүргізушінің қаза тапқанын растады. Аталған дерек бойынша қылмыстық іс қозғалып, тергеу амалдары жүргізіліп жатыр. Құқық қорғау органдары трактордың аударылу себептері мен оқиғаның барлық мән-жайын анықтауда.
Алайда қайғылы оқиғадан кейін тағы бір жайт белгілі болды. Жұмыс беруші қызметкердің қаза тапқаны туралы мемлекеттік еңбек инспекциясына хабарламаған.
Ақмола облысының Мемлекеттік еңбек инспекциясы департаментінің мәліметінше, жұмыс берушіден жазатайым оқиға туралы тиісті хабарлама түспеген.
Қазақстанның еңбек заңнамасына сәйкес, жұмыс беруші еңбек қызметіне байланысты жазатайым оқиғалар туралы уәкілетті органдарға уақытылы хабарлауға міндетті.
Бұл талапты орындамағаны үшін әкімшілік жауапкершілік қарастырылған. Сондай-ақ жұмыс берушіге тиісті хабарламаны жолдау туралы нұсқама берілмек.
Тергеу барысында көп тонналық техниканың қандай себеппен аударылғаны, оны пайдалану кезінде қауіпсіздік талаптарының сақталған-сақталмағаны және еңбекті қорғау ережелерінің бұзылу ықтималдығы анықталуы тиіс.
Қайғылы оқиғаның нақты себептері әзірге белгісіз.










