Қазақстанда балалардың суға батып қаза табу деректері әлі де өзекті мәселе болып отыр. Төтенше жағдайлар министрлігінің мәліметінше, биылғы он айда еліміздің су айдындарында 47 бала көз жұмған.
Ведомствоның бағалауынша, қайғылы оқиғалардың шамамен 85 пайызы балалардың ата-аналары немесе басқа ересектер тарапынан тиісті бақылаусыз қалуынан болған.
Бұл мәселені «Ақ жол» партиясының депутаты Юрий Ли Құрылтайдағы Үкімет сағатында көтерді. Ол балалар қауіпсіздігін тек ескерту белгілерін орнатумен шектеуге болмайтынын айтып, қауіпсіз шомылу орындарын көбейту және балаларды жүзуге жүйелі түрде үйрету қажеттігіне назар аударды.
ТЖМ мәліметінше, Қазақстанда шомылуға тыйым салынған 5 мыңнан астам аумақ анықталған. Ол жерлерге 6 мыңнан астам тыйым салу белгісі орнатылған.
Сонымен қатар ел аумағында 600-ге жуық жабдықталмаған жағажай бар. Олардың 200-ден астамын талапқа сай жабдықтап, ресми шомылу орнына айналдыруға мүмкіндік бар.
Юрий Ли көтерген негізгі мәселе — балаларға қауіпсіз демалыс жағдайын жасау және судағы қайғылы оқиғалардың алдын алу. Депутат балаларды жүзуге үйрету мен қауіпсіз инфрақұрылымды дамытуға жүйелі көзқарас қажет екенін жеткізді.










