Оқу-ағарту министри Жұлдыз Сүлейменованың Құрылтайдағы Үкімет сағатында мәлімдеуінше, Ұлттық қордан аударылатын қаржы көлемі жыл сайын ұлғайып келеді. Салыстырмалы түрде алсақ: 2024 жылы балалардың шоттарына 695,5 млн доллар бағытталса, 2025 жылы бұл сома 888,8 млн долларды құрады, ал 2026 жылы 901,7 млн долларға жетті.
Бұдан бөлек, ведомство мәліметінше, соңғы жылдары өскелең ұрпақтың әл-ауқатын қамтамасыз етуге арналған жалпы мемлекеттік шығыстар үш есеге өсіп, 6,4 трлн теңгеге жеткен.
Еске сала кетейік, «Ұлттық қор – балаларға» бағдарламасы 2024 жылы басталған. Жыл сайын қордың инвестициялық табысының бір бөлігі еліміздің барлық кәмелетке толмаған азаматтары арасында теңдей бөлінеді. 18 жасқа толғаннан кейін жинақталған қаражатты білім алуға немесе тұрғын үй жағдайын жақсартуға жұмсауға болады.










