Қызылорда облысында 16 жастағы Балсұлу Өмірзақтың өліміне қатысты қылмыстық іс бойынша сот үкімі шықты. 22 жастағы сотталушы 20 жылға бас бостандығынан айырылды.
Қайғылы жағдай маусым айында Шиелі ауданында болған. Оқиғаға дейін қыз әлеуметтік желі арқылы ер адаммен танысқан. Сол күні екеуі кездесіп, ер адам оны Жахаев атындағы каналға алып барған.
Канал маңында олардың арасында жанжал туындаған. Тергеу мәліметінше, ер адам қызды тұншықтырып өлтіріп, денесін суға тастаған. Кейін марқұмның мойнынан қалың сым табылған.
Қыздың жоғалғаны туралы хабарланғаннан кейін оны іздеу жұмыстары басталған. Бір тәуліктен соң оның денесі каналдан табылды. Күдікті көп ұзамай ұсталды. Оның бұған дейін де сотталғаны анықталды.
Сотта айыпталушы кінәсін мойындап, марқұмның жақындарынан кешірім сұрады.
Сот шешімімен ол 20 жылға бас бостандығынан айырылды. Жаза орташа қауіпсіздік деңгейіндегі қылмыстық-атқару жүйесі мекемесінде өтеледі.
Сонымен қатар, сотталушыдан жәбірленуші тараптың пайдасына 10 млн теңге моральдық өтемақы төлеуге міндетті.
