Жаңа сервистер сайлаушыларды толық есепке алуға және азаматтардың сайлауға қатысу жөніндегі конституциялық құқығын жүзеге асыруына қосымша жағдай жасауға бағытталған.
Барлығы екі цифрлық құрал қарастырылған. Біріншісі азаматтың тұрғылықты жері бойынша тіркелгенін сайлау учаскесінде тексеруге мүмкіндік береді. Екіншісі арқылы сайлау учаскесінің мекенжайы бойынша уақытша тіркеу рәсімдеуге болады.
Тіркеуді тексеру сервисін сайлау комиссиясының мүшелері учаскеге келген азамат өзін сайлаушылар тізімінен таппаған жағдайда қолданады.
Мұндай кезде комиссия азаматтың тұрғылықты жері бойынша тұрақты тіркеуінің бар-жоғын тексереді. Егер оның тіркелген мекенжайы осы сайлау учаскесінің аумағына кіретіні анықталса, азамат сайлаушылар тізіміне енгізіледі.
Осыдан кейін оған сайлау бюллетені беріліп, дауыс беруге мүмкіндік жасалады.
Тіркеуді тексеру сервисі еліміздегі 5 106 сайлау учаскесінде қолжетімді болады.
Қазақстанда тұрғылықты жері бойынша тұрақты тіркеуі жоқ азаматтар үшін «Уақытша тіркеу» атты жеке сервис қарастырылған.
Дауыс беру күні 221 сайлау учаскесінде арнайы шағын халыққа қызмет көрсету орталықтары жұмыс істейді. Орталық қызметкерлері азаматты тиісті сайлау учаскесінің мекенжайы бойынша уақытша тіркей алады.
Тіркеу рәсімі аяқталып, мәліметтері тексерілгеннен кейін азамат сайлаушылар тізіміне енгізіледі. Оған бюллетень беріліп, дауыс беруге мүмкіндік жасалады.
Осылайша, жаңа цифрлық сервистер тіркеу мен азаматтарды сайлаушылар тізіміне енгізуге қатысты мәселелерді дауыс беру күні жедел шешуге мүмкіндік береді. Бұл тіркеу деректерінің болмауы немесе сәйкес келмеуі салдарынан азаматтардың сайлауға қатысу құқығынан айырылып қалмауына жағдай жасайды.
