Қазақстанда жаңа SIM-карта алған адамдарға нөмірдің бұрынғы иесін іздеген коллекторлар хабарласуда. Мұндай жағдай SHYNDYK.KZ редакциясында да орын алды. Ресми дүкеннен алынған жұмыс нөміріне көп ұзамай белгісіз адамның қарызына қатысты қоңыраулар түсе бастаған.
Kcell компаниясының түсіндіруінше, бұған бұрын қолданылған нөмірлердің қайта сатылымға шығарылуы себеп болуы мүмкін.
«Жойылған нөмірлер қайта шығарылады. 12 айдан кейін Компания оны сатылымға шығаруға құқылы», — деп хабарлады компания.
Алайда нөмірді сатып алмас бұрын оның бұған дейін басқа адамға тиесілі болған-болмағанын анықтау мүмкін емес.
«Өкінішке қарай, нөмірдің бұрын қолданылғанын немесе қолданылмағанын тексеру мүмкін емес», — деп атап өтті Kcell.
Компания мұндай жағдайда нөмірді тегін ауыстыру мүмкін еместігін де айтты.
Егер жаңа нөміріңізге бөтен адамның қарызына байланысты қоңыраулар түсе бастаса, Kcell коллекторлық ұйымға хабарласып, нөмірдің қазір басқа абонентке тиесілі екенін түсіндіруді ұсынады. Сондай-ақ нөмірді борышкерлер базасынан алып тастауды өтінуге болады дейді Kcell компанияның түсіндіруінше.
