Мыңдаған адамның алдында сөз сөйлеген партия төрағасы Айбек Дадебай «Әділеттің» саяси тұғырнамасы жаңа Конституция қағидаттарымен және Мемлекет басшысының стратегиялық бағытымен тығыз байланысты екенін атап өтті. Оның айтуынша, саяси бірлестіктің басты артықшылығы – білікті әрі жан-жақты командасы.
«Бүгінде партиямыз түрлі өңір, буын және кәсіп өкілдерін біріктіріп отыр. Партиялық тізімнің өзінде 20-дан астам саланың мамандары бар. Әрқайсысының тәжірибесі, білімі және ел дамуына қатысты өзіндік көзқарасы бар. Ал бәрімізді ортақ құндылықтар – әділеттілік, отаншылдық, жауапкершілік, еңбекқорлық пен өрлеу біріктіреді. Бұл – біздің қағидаттарымыз әрі партия саясатының негізі», – деді Айбек Дадебай.
Осындай жан-жақты көзқарас партияға өңірлердегі жұмысты тиімді жолға қоюға мүмкіндік берді. Белсенді үгіт-насихат науқаны барысында республикалық сайлауалды штаб Қазақстанның барлық 20 өңірін қамтыды. Кандидаттар қала мен шалғай ауыл тұрғындарымен, жұмысшылармен, дәрігерлермен, мұғалімдермен және кәсіпкерлермен ашық пікір алмасты. Мұндай кездесулер жекелеген өңірлерге тән мәселелерді ғана емес, бүкіл қоғамды толғандыратын ортақ түйткілдерді де анықтауға көмектесті. Олардың қатарында лайықты еңбекақы мен еңбек қауіпсіздігі, бизнес жүргізудің түсінікті ережелері, сапалы медицина мен білімге тең қолжетімділік бар.
Бұл мәселелерді шешу жолдары «Әділетті болашақ үшін» сайлауалды бағдарламасында егжей-тегжейлі жазылған. Форум барысында салалық сарапшылар бағдарламаның негізгі бағыттарын таныстырды. Дихан Қамзабекұлы ұлттық мәдени код пен «Адал азамат» қағидаттарына тоқталса, Лаура Қарабасова STEM бағыттарын дамыту және тірек мектептер базасында математикалық сыныптар ашу секілді білім беру бастамаларын ұсынды. Вадим Басин кәсіпорындарды жаңғырту және зиянды өндірістерде еңбек ететін жұмысшылардың әлеуметтік кепілдіктерін қорғау мәселелерін көтерді.
Белла Газдиева қоғамның мемлекеттік институттарға деген сенімі мәселесіне тоқталып, «Заң мен тәртіп» қағидаты әділдік пен ашықтыққа негізделетінін айтты. Кирилл Осин су тапшылығынан бастап «Таза Қазақстан» бастамасы аясында ресурстар есебін цифрландыруға дейінгі экологиялық мәселелерге назар аударды. Ал Айсұлу Сүлейменова инклюзивті ортаны дамыту және азаматтарды цифрлық алаяқтықтың жаңа түрлерінен қорғау жоспарын таныстырды.
Ауқымды саяси науқанды қорытындылаған Айбек Дадебай оған атсалысқан барша азаматқа алғыс айтып, негізгі көрсеткіштерді жариялады. Үгіт-насихат жұмыстары басталғалы партия алты миллионнан астам адамды қамтыған 21 мыңнан астам іс-шара өткізді. «Әділетті Қазақстан үшін» мобильді керуені 99 елді мекенге барды. Өңірлердегі үздіксіз жұмысты 247 штаб пен 30 мыңға жуық сенімді өкіл қамтамасыз етті.
Партия төрағасы қазақстандықтарды азаматтық белсенділік танытуға шақырды. Ол науқан барысында жинақталған тәжірибе мен халық сенімі шынайы әділетті мемлекет құрудың берік негізіне айналатынына сенім білдірді.
