Алматы облысында өз күйеуін өлтірді деп айыпталған көпбалалы әрі жүкті әйелге қатысты сот процесі аяқталды. Бұл атышулы іс алқабилердің қатысуымен қаралды.
Қайғылы оқиға отбасылық жанжал кезінде болған. Қылмыстық іс материалдарына сүйенсек, әйел асүй пышағымен күйеуінің жүрек тұсына бір рет соққы жасаған. Алған жарақатынан ер адам сол жерде көз жұмды. Осыған байланысты оған ҚР Қылмыстық кодексінің 99-бабы 1-бөлігі (Адам өлтіру) бойынша айып тағылған болатын.
Алайда, істі жан-жақты қараған алқабилер сотталушыны кінәсіз деп таныды. Олардың шешімі негізінде сот ақтау үкімін шығарып, бұлтартпау шарасының күшін жойды және әйелді қамаудан босатты. Айта кетейік, үкім шыққанға дейін ол тергеу изоляторында отырған еді.
Осы оқиғаны назарында ұстаған құқық қорғаушылардың сөзінше, қайғылы жағдайға ұзақ жылдар бойы жалғасқан тұрмыстық зорлық-зомбылық себеп болған. Олардың мәліметінше, марқұм әйелін бірнеше рет ұрып-соғып, қылғындырып, түрлі қорлық көрсетіп келген. Бұл мән-жай сотта қаралған істің ең маңызды бөлшектерінің біріне айналды.
Ал марқұмның туыстары бұл ақтау үкімімен мүлдем келіспейді. Олар істің қайта қаралуына қол жеткізетіндерін мәлімдеді. Әзірге сот үкімі заңды күшіне енген жоқ.
