Қайғылы оқиға болған көпқабатты үйдің МИБ (мүлік иелері бірлестігі) төрайымы Сәуле Жұбаниязова айыпталушылар орындығында.
Таңғы отырыс күтпеген мәлімдемеден басталды. Сотталушы Жұбаниязованың қорғаушылар қатарына адвокат Асхат Әлімов қосылып, қылмыстық іс материалдарымен танысу үшін қосымша уақыт сұрады. Алайда судья Меруерт Абаевадан бас тарту жауабын алған адвокат оған қарсылық білдіріп, судьяны істен шеттетуді талап етті.
Бұл өтінішті судья Самат Сембаев қарап, қорғаушы тараптың талабын қанағаттандырудан бас тартты. Отырысты Меруерт Абаева әрі қарай жалғастырды. Сонымен қатар сот жұмыстың нақты тәртібін бекітті: алдымен жәбірленушілер мен куәгерлерден жауап алу, іс материалдарын зерттеу, содан кейін барып сотталушыдан жауап алу.
Түскі үзіліске дейін сот жәбірленушілерден жауап алуға кірісті. Бірінші болып марқұмның күйеуі Әділет Зейнел түсініктеме берді. Ол 19 қараша күні отбасына Астана әкімдігінің өкілдері мен мәслихат депутаты хабарласып, материалдық көмек ретінде қолма-қол 20 миллион теңге табыстағанын айтты.
Ер адамның айтуынша, қаражат келесідей бөлінген:
-
9,2 млн теңге автокөлік несиесін жабуға жұмсалды.
-
4,5 млн теңге Ұлдананың анасына берілді.
-
Шамамен 4,3 млн теңгені марқұмның өз атындағы несиелерін (ай сайынғы төлемі 210-215 мың теңге болған) жабуға жұмсау жоспарланған, алайда оның банк шоттары алты айға бұғатталып қалған.
-
Қалған сома ұсақ-түйек шығындар мен садақаға (оның ішінде құрбандыққа қой союға) жұмсалды.
Сот отырысының бірінші жартысындағы ең ауыр сәт марқұмның анасы Сәлима Омарованың жауап беруі болды. Ол 2025 жылдың 8 қарашасында болған қайғылы күнді көз жасын көлдете отырып еске алды. Анасы қызымен оның ажал құшатын шақыртуға шығар алдында ғана телефонмен сөйлескен екен.
«Дүкенге кіріп-шыққан 15 минуттың ішінде маған Әділеттің анасы бірнеше рет хабарласты. Даусынан қатты қобалжып тұрғаны байқалды. Мен: “Бәрі дұрыс па?” деп сұрадым. Ол Ұлдананың үстіне қабырға құлап кеткенін айтты», – деді Сәлима Омарова.
Бастапқыда анасы қызының үстіне дүкендегі сөре құлап кеткен шығар деп ойлаған. Бірақ көп ұзамай үлкен қызы Астанаға шұғыл ұшу керектігін хабарлайды. Елордалық ауруханада бұл уақытта Ұлданаға ота жасалып жатқан еді.
«Кейінірек ішке кіруге рұқсат берді. Сол сәтте мен өз қызымның қайда жатқанын түсіне алмадым… Тіпті оны танымай қалдым. Ол шақыртудан кейін маған қайта хабарласуы керек еді ғой… Жанымызда жүрген жансақтау бөлімінің қызметкерлері бұл жерде ұзақ тұруға болмайтынын айтып, мені сыртқа алып шықты», – деп аяқтады сөзін марқұмның анасы.
Түскі үзілістен кейін сот процесі өз жалғасын табады. Редакция істің мән-жайын жіті бақылауда ұстайтын болады.
