Ақмола облысының Атбасар қаласында қатыгездікпен шабуыл жасау дерегі орын алды. Жергілікті тұрғын — 58 жастағы әйел іш тұсынан алған көптеген пышақ жарақатымен ес-түссіз күйде табылды.
SHYNDYK.KZ редакциясының хабарлауынша, пәтерге кіріп, зардап шеккен азаматшаға шұғыл көмек көрсету үшін полиция қызметкерлері есікті бұзып кіруге мәжбүр болған. Зардап шеккен әйел шұғыл түрде ауруханаға жеткізілді.
Алдын ала болжам бойынша, бұл қылмысқа көрші әйелдің қатысы болуы мүмкін. Оқиғадан кейін ол пәтерді сыртынан құлыптап, қылмыс құралы — пышақты өзімен бірге алып, оқиға орнынан бой тасалаған.
Өңірлік полиция департаменті қасақана ауыр зиян келтіру фактісі бойынша қылмыстық іс қозғалғанын мәлімдеді. Күдікті азаматша ұсталып, уақытша ұстау изоляторына қамалды. Қазіргі уақытта оқиғаның барлық мән-жайы анықталып жатыр.
