Қазақстан Халық партиясының төрағасы Нұрсұлтан Шоқанов тарихи оқиға – Құрылтайға алғашқы сайлау қарсаңында 24KZ телеарнасының тікелей эфирінде өткен сайлауалды «Басты дебат – 2026» пікірсайысында мазмұнды әрі сенімді сөз сөйледі. Ол еңбек адамының қазіргі заманның нағыз қаһарманы екенін айтып, партияның негізгі құндылығын паш етті.
Халықтың зор қызығушылығын тудырып, азаматтардан 59 мыңға жуық сұрақ жинаған дебат барысында Нұрсұлтан Шоқанов қазақстандықтардың нақты мәселелерін терең түсінетінін көрсетіп, әлеуметтік бағыттағы айқын іс-қимыл жоспарын ұсынды. Төрағаның ең тың бастамаларының бірі – заңсыз иемденіп, кейін мемлекетке қайтарылған активтер есебінен қаржыландырылатын арнайы Алимент қорын құру болды. Бағдарламаның экономикалық блогын тарқата келе, саясаткер елдің дамуы әрбір өңірдің өзіндік ерекшелігі мен қажеттілігіне негізделуі тиіс екенін баса айтты. Сонымен қатар, партия монополистердің қызметін қатаң бақылауда ұстауды және шағын мен орта бизнесті жан-жақты қолдауды талап ете отырып, барлық азаматтың сапалы азық-түлікке, заманауи медицина мен білімге тең әрі кедергісіз қол жеткізу құқығын табанды түрде қорғайды.
Сайлауалды науқан кезінде еліміздің түкпір-түкпірінде өткен мыңнан астам кездесудің нәтижесіне сүйенген Нұрсұлтан Шоқанов партиямен бірге саясатқа қоғамның өзекті мәселелерін күнделікті шешіп жүрген нағыз жасампаз жандар – жұмысшылар, дәрігерлер, мұғалімдер мен кәсіпкерлер келе жатқанын атап өтті. Ұрпақтар сабақтастығы мен социалистік идеалдарға деген ерекше құрмет дебатқа арнайы қонақ ретінде шақырылған партияның негізін қалаушылардың бірі, көрнекті ғалым, профессор Александр Алексеевич Холодковтың қатысуымен айшықтала түсті.
Халық партиясының жетекшісі өз сөзін бүкіл науқанның негізгі өзегіне айналған қуатты тезиспен қорытындылады: «Әділетті мемлекеттің күші – адамда, елдің байлығы – адамда, қоғамның тұрақтылығы – бірлікте». Осы арқылы Нұрсұлтан Шоқанов ҚХП-ның адал еңбекті ымырасыз қорғауға және ұлттық ресурстардың басым көпшілікке қызмет етуіне қол жеткізуге дайын сенімді саяси күш екенін тағы бір мәрте дәлелдеді.
