Румыния парламенті депутатының айтуынша, Қазақстанға түрлі елдерден байқаушылар келген. Дауыс беру күні олар еліміздің әр өңірінде жұмыс істеп, сайлау барысын бақылап жүр.
Габор Хайду Қазақстанның халықаралық аренада, соның ішінде ЕҚЫҰ аясында маңызды рөл атқаратынын атап өтті. Сондықтан елдегі сайлау халықаралық қоғамдастықтың жіті назарында.
— Қазіргі уақытта есебіміз әлі дайын емес. Жұмысымызды аяқтап, нәтижелерді әріптестерімізбен талқылағаннан кейін оны ертең түстен кейін жариялаймыз, — деді миссия басшысы.
Дауыс беру басталғанға дейін миссия өкілдері азаматтық қоғам, қоғамдық ұйымдар және бұқаралық ақпарат құралдарының өкілдерімен кездесті. Сондай-ақ байқаушылар Парламент депутаттарымен және мемлекеттік органдардың өкілдерімен келіссөздер өткізді.
Хайдудың айтуынша, жаңа Конституцияның қабылдануы биылғы сайлаудың маңызын арттыра түсті. Ол халықаралық байқаушылардың еліміздің әр өңіріндегі жұмысын жалғастыратынын, ал қорытынды пікір барлық рәсім аяқталғаннан кейін ұсынылатынын айтты.
