Бүгін ауданаралық сот ғимаратының алдында Мүлік иелері бірлестіктерінің (МИБ) төрағалары Қазақстан Президентіне тікелей бейнеүндеу жолдады. Олар Ұлдана Мырзуанның өліміне әкеп соқтырған қайғылы оқиғадан кейін сотқа тартылған әріптесі Сәуле Жұбаниязоваға араша түсті, деп хабарлайды SHYNDYK.KZ.
Сотталушының әріптестері оған тағылған айыппен үзілді-кесілді келіспейтіндерін білдірді. Олардың айтуынша, МИБ төрағасы көпқабатты үйдің қасбетіндегі әрбір кондиционердің бекіткіштері қаншалықты сенімді екенін көзбен көріп, жасырын ақауларды анықтай алмайды.
Жиналғандар: «Осындай прецеденттен кейін кімнің МИБ басқарғысы келеді?» деген орынды сауал тастады. Үндеу авторлары мұндай қайғылы жағдайларға қарапайым үй басқарушылары емес, қасбетті орнату кезінде қателікке бой алдырған құрылыс компаниялары мен үйлердің қауіпсіздігіне жыл сайын техникалық аудит жүргізетін құзыретті мекемелер жауап беруі тиіс деп санайды.
