Конвенцияға қатысушы мемлекеттер белгіленген талаптарды сақтай отырып, қылмыстық істер бойынша бір-біріне құқықтық көмек көрсетеді.
Бұл Қазақстанның шетелдегі дәлелдер мен басқа да қажетті материалдарды алу мүмкіндігін кеңейтеді. Сондай-ақ құжат заңсыз жолмен елден шығарылған активтерді іздеу және қайтару жұмыстарына көмектеседі.
Қазақстан мүлікті іздеу немесе оған тыйым салу туралы өтініштерді белгілі бір талаптар орындалған жағдайда ғана қарайды. Атап айтқанда, жасалған әрекет екі мемлекетте де қылмыс болып саналуы және Қазақстан заңнамасында қылмыстық жауапкершілік көзделуі керек.
Конвенцияда шетел азаматы ұсталған немесе қамауға алынған жағдайда оның өтініші бойынша консулдыққа хабарлау тәртібі де қарастырылған.
Ал сотқа немесе тергеу органына келу туралы шақырту белгіленген күннен кемінде 50 күн бұрын жіберілуі тиіс.
Қазақстанға басқа мемлекеттерден келетін сұраулар қазақ немесе орыс тіліндегі аудармасымен бірге ұсынылуы қажет.
