Қол жеткізілген уағдаластыққа сәйкес, рұқсат етілген тұрақты рейстер саны аптасына 28-ден 70-ке дейін артады. Осылайша, апталық рейстер саны 42-ге көбейіп, белгіленген шек 2,5 есе ұлғаяды.
Жаңа келісім авиакомпанияларға қолданыстағы бағыттар бойынша ұшу жиілігін арттыруға, сондай-ақ Қазақстан мен Сауд Арабиясының қалалары арасында жаңа бағыттар ашу мүмкіндігін қарастыруға жол ашады.
Негізгі бағыттардың бірі Астана мен Эр-Рияд арасындағы тікелей әуе қатынасы болмақ. Жаңа рейс жолаушыларға екі елдің астанасы арасында ауысып отырмай ұшуға мүмкіндік береді.
Сонымен қатар тараптар Қазақстан мен Сауд Арабиясының басқа қалалары арасындағы рейстер санын көбейтуді жоспарлап отыр. Қандай бағыттар кеңейтілетіні немесе жаңадан ашылатыны әзірге нақтыланған жоқ.
Рейстер санының артуы туристік, іскерлік және жеке сапарларға қосымша мүмкіндік беріп, екі ел арасындағы әуе қатынасын қолжетімді әрі ыңғайлы ете түседі. Жаңа бағыттардың ашылу мерзімі мен нақты ұшу кестесін авиакомпаниялар белгілейді.
