Жаңа оқу жылы қарсаңында Қазақстанда мемлекеттік жалпыға міндетті білім беру стандарттары мен үлгілік оқу жоспарлары толығымен қайта қаралды. Оқу-ағарту министрі Жұлдыз Сүлейменованың үкімет отырысында мәлімдеуінше, өзгерістердің басты мақсаты — білім беру процесін еліміздің жаңартылған Конституциясының ережелерімен үйлестіру.
1 қыркүйектен бастап оқушылардың құқықтық сауатын ашуға бағытталған қосымша міндетті курстар енгізіледі. Атап айтқанда, 5-7 сынып оқушылары «Конституция негіздерін» оқыса, жоғары сынып (8-11 сыныптар) оқушыларының кестесіне «Заң және тәртіп» пәні қосылады. Ал орта және жоғары буын (5-11 сыныптар) үшін өте маңызды саналатын «Жеке қауіпсіздік» курсы оқытылатын болады.
Бұдан бөлек, бұған дейін тек факультатив ретінде жүргізіліп келген «Құқық негіздері» пәні енді барлық оқушылар үшін міндетті мәртебеге ие болды. Оның мазмұны да Ата заңның жаңа редакциясының қағидаттарын ескере отырып, терең қайта өңделді.
Жалпы, министрліктің мәліметінше, жаңа оқу жылында еліміздегі 8 мыңнан астам мектепте 4,1 миллион бала білім алады. Оның 380 мыңы бірінші сынып табалдырығын аттайды.
Ауқымды реформалар мектепке дейінгі білім беру саласында да өз жемісін беруде. Бұл бағытта ваучерлік қаржыландыру жүйесі белсенді түрде енгізіліп жатыр. Жұлдыз Сүлейменованың айтуынша, бүгінгі таңда еліміздің 20 қаласы мен 23 ауданында 1,1 миллион ваучер берілген.
Аталған механизм айтарлықтай нәтиже берді: екі жастан алты жасқа дейінгі бүлдіршіндердің балабақша кезегі 160 мыңнан 23 мыңға дейін күрт қысқарды. Оған қоса, жаңа тәсіл бюджеттің 35,3 млрд теңгесін үнемдеуге мүмкіндік берді. Қазіргі кезде республикада 12 мыңнан астам мектепке дейінгі ұйым жұмыс істейді, олар бір миллионнан астам баланы қамтып отыр. Оның ішінде 360 мың бүлдіршін мектепалды даярлықтан сәтті өткен.
