Бұған Алматы тауларындағы сенбілік кезінде түсірілген видео себеп болған. Куәгерлер сыртқы ілмегіне ұзын құбырлар ілінген тікұшақтың бұл аймақтан бірнеше рет ұшып өткенін байқаған.
Жазба авторы бұл жүк Almaty SuperSki жобасы бойынша құрылыс жүріп жатқан аумаққа жеткізілуі мүмкін деп болжады. Сондай-ақ куәгерлердің дәл осындай құбырларды таулы аймақтан көруі түрлі сұрақтарды одан сайын көбейткен.
Жазба әлеуметтік желілерде тез тарап, кейбір қолданушылар тікұшақтың ұшуын құрылыс жұмыстарымен байланыстырып, оны нақты факт ретінде қабылдай бастады. Алайда ресми мәлімет мүлде басқа болып шықты.
Төтенше жағдайлар министрлігі SHYNDYK.KZ-ке құбырларды тасымалдаудың Көкжайлау аумағына және құрылыс жобаларына еш қатысы жоқ екенін хабарлады.
«Пабликтердің бірінде жарияланған сифон құбырларын тасымалдаудың Көкжайлау аумағына қатысы бар деген ақпарат шындыққа жанаспайды», – деп мәлімдеді ТЖМ.
Ведомствоның түсіндіруінше, тікұшақ «Қазселденқорғау» мекемесінің жоспарлы профилактикалық жұмыстарына жұмылдырылған. Мамандар сел қаупін тудыруы мүмкін биік таулы мореналық көлдердегі су деңгейін реттеп жатыр.
Мұндай су айдындары тұрақты бақылауды қажет етеді. Су көп жиналған жағдайда табиғи бөгеттер бұзылып, сел жүру қаупі туындайды. Сондықтан мамандар суды қауіпсіз деңгейде ұстап тұру үшін жыл сайын кешенді түрде алдын алу шараларын жүргізеді. Видеоға түсіп қалған құбырлар дәл осы жұмыстарға арналған.
«Суды сорып, қауіпсіз жолмен ағызып жіберу үшін полиэтилен сифон құбырлары қолданылады. Мореналық көлдердің басым бөлігі баруға қиын биік таулы аймақтарда орналасқандықтан, құбырлар, құрал-жабдықтар мен қажетті материалдар Қазақстан Республикасы Төтенше жағдайлар министрлігінің тікұшақ авиациясын тарту арқылы жеткізіледі», – деп түсіндірді ведомстводан.
Осылайша, ТЖМ тікұшағының тау үстінде құбырлармен ұшуы құрылысқа емес, Алматының сел қауіпсіздігін қамтамасыз етуге байланысты болып отыр.
Қазіргі таңда алдын алу шаралары бірден алты мореналық көлде жүргізіліп жатыр. Сонымен қатар мамандар су бұру арналарын ретке келтіруде: оларды тазартып, артық суды қауіпсіз ағызуға қажетті учаскелерді қалпына келтіру үстінде.
Сондай-ақ ТЖМ бүгінгі күні алаңдауға еш негіз жоқ екенін атап өтті.
«Алматының таулы аймағындағы гидрологиялық және сел жағдайы тұрақты, сел жүру қаупі жоқ. Дегенмен, ықтимал төтенше жағдайлардың алдын алу, халықтың және қала инфрақұрылымы нысандарының қауіпсіздігін қамтамасыз ету мақсатында профилактикалық жұмыстар жалғасып жатыр», – деп хабарлады ведомство.
Тікұшаққа қатысты бұл оқиға әлеуметтік желідегі куәгердің болжамы қаншалықты тез бұрмаланып, басқаша сипат алып кететінін айқын көрсетеді. Әсіресе алматылықтар үшін аса маңызды саналатын Көкжайлау аумағына қатысты болғандықтан, мұндай ерекше жүктің сұрақ тудыруы заңдылық. Алайда көзбен көргенді бірден құрылыс жобаларымен байланыстырмас бұрын, осы жұмыстарды тікелей атқарып жатқан қызметтердің түсініктемесін күткен жөн.
Бұл жағдайда әлеуметтік желіде қызу талқыланған құбырлар Алматы тауларындағы сел қаупінің алдын алуға бағытталған жыл сайынғы жұмыстардың бір бөлігі болып шықты.
