Қабылдансқан жаңа нормаларға сәйкес, бұдан былай министрлік жұмылдыру дайындығы мен жұмылдыру үшін тікелей жауапты болады, сондай-ақ жұмылдыру органдарының қызметкерлеріне өз міндеттерін тиісті деңгейде атқаруға қажетті жағдайдың бәрін жасауға міндеттеледі. Бұған қоса, ведомство жұмылдыру резервінің материалдық құндылықтарын қалыптастыру және сақтау шығындарының көлемі мен құрылымы бойынша Үкіметке ұсыныстар енгізеді.
Жаңа функциялардың едәуір бөлігі азаматтық қорғанысқа және төтенше жағдайлардың алдын алуға қатысты. Атап айтқанда, министрлік өзінің азаматтық қорғаныс жоспарын әзірлеп, бекітеді, тиісті нормативтер мен ережелерді қабылдайды, табиғи және техногендік сипаттағы төтенше жағдайлардың мемлекеттік салалық есебін жүргізіп, деректерді уәкілетті органға жолдайды. Сондай-ақ ведомствоға жағдайды бақылайтын, бақылау жасайтын және болжайтын қарауындағы қызметтерге басшылық жасау жүктелген. Министрлік ғылыми зерттеулерді ұйымдастырып, халық пен мамандарды оқытумен айналысады, азаматтық қорғаныс саласындағы нормативтік актілердің орындалуын қамтамасыз етеді, қарауындағы ұйымдарда өрттің алдын алу шараларын жүргізеді, азаматтық қорғаныс мүліктерінің қорын құрып, салалық жүйелерді басқарады.
Бұдан бөлек, министрлік әскери-экономикалық және командалық-штабтық оқу-жаттығуларға қатысады, қосалқы және көмеkші басқару пункттерін ұйымдастырады. Сонымен қатар жұмылдыру, соғыс жағдайы кезінде және әскери уақытта Қарулы Күштердің, басқа да әскерлер мен әскери құрылымдардың мүддесі үшін, сондай-ақ экономиканың үздіксіз жұмысы мен халықтың тыныс-тіршілігін қамтамасыз ету мақсатында әлеуметтік-еңбек саласындағы арнайы құрамалардың қызметін ұйымдастырады. Оған қоса, ведомство халықтың жүріп-тұруы шектеулі топтарының құрылыс нысандарына кедергісіз кіре алуын қамтамасыз етуді растау, стандарттау жобаларын қарастыру және ТЖ алдын алу талаптарын орындау құқығына ие болды.
Өзгерістердің бір бөлігі 2026 жылғы 13 тамыздан бастап күшіне енді. Аталған күннен бастап министрлік мемлекеттік мекемелер мен квазимемлекеттік сектор субъектілерінің цифрлық кадр жүйесі арқылы еңбек заңнамасының сақталуына мониторинг жүргізеді, сондай-ақ арнайы әлеуметтік қызметтер көрсететін ұйымдар желісінің нормативтерін әзірлеп, бекітеді.
Ал 2027 жылғы 1 қаңтардан бастап ведомствоның жұмысы тағы да бірқатар ауқымды міндеттермен толығады. Бұл тізімге әлеуметтік-еңбек саласындағы жұмылдыру тапсырысын орындауға қажетті тауарлар тізімі мен көлемін есептеу әдістемесін әзірлеу, ұйымдардың қажеттіліктеріне талдау жасау, мемлекеттік материалдық резервтің номенклатурасы мен көлемі бойынша ұсыныстар енгізу, жеткізуге тапсырыс орналастыру, материалдық құндылықтарды жаңарту, ауыстыру немесе гуманитарлық көмек үшін босату туралы шешім қабылдау сияқты шаруалар кіреді.
Аталмыш қаулы 2027 жылғы 1 қаңтардан бастап қолданысқа енгізілетін нормаларды қоспағанда, 2026 жылғы 10 тамыздан бастап заңды күшіне енді.
