Оқиға түнгі сағат 01:00-де болған. Полиция қызметкерлері терезелері ашық, ішінен музыка қатты шығып тұрған көлікке назар аударған. Көлік ішіндегі қыздар дауыстарын қатты шығарып, түнгі тыныштықты бұзған.
Полиция қызметкерлері автокөлікке жақындап, құжаттарды тексеріп, жүргізушіге өздерінің келу себебін сабырлы түрде түсіндірген. Сол кезде олар ауызша ескертумен шектеліп, қыздарды жіберген.
Алайда кейін Шұғыла Сабит әлеуметтік желіде видео жариялап, өзін «күлгені үшін жазалағанын» айтқан. Полиция бұл ақпараттың шындыққа жанаспайтынын мәлімдеді.
Ескерту жасалған сәт қызметкерлердің кеудеге тағылатын бейнетіркегіштеріне жазылған. Жазбаларды тексеру барысында полиция қызметкерлерінің әрекетінен заң бұзушылық анықталмаған.
Кейін қала тұрғыны түнгі уақытта тыныштықты бұзғаны, полиция қызметкерлерінің заңды талаптарына бағынбағаны, ұсақ бұзақылық жасағаны және жалған ақпарат таратқаны үшін жауапкершілікке тартылды.
Сот шешімімен оған әкімшілік қамау жазасы тағайындалды. Сонымен қатар әкімшілік айыппұлдар салынып, ресми ескерту жасалды. Полиция хабарламасында қамау мерзімі мен айыппұлдардың нақты сомасы көрсетілмеген.
Қабылданған шаралардан кейін Шұғыла Сабит әлеуметтік желідегі тиісті жазбаларын өшірді.
Полиция арандатушылық әрекет, мемлекеттік билік өкілдеріне құрметсіздік таныту және жалған ақпарат тарату заңда белгіленген жауапкершілікке әкеп соғуы мүмкін екенін еске салды.
