Өрт 22 тамызда Рино қаласының солтүстік-батысындағы Hawk Meadow Trail соқпағы маңында басталған. Төтенше жағдайлар қызметіне алғашқы хабар жергілікті уақыт бойынша шамамен сағат 11:15-те түсті. Жалын құрғақ өсімдіктерге тез тарап, тұрғын аудандарға жақындаған.
Өрт шарпыған аумақ 13 мың акрға, яғни 5,2 мың гектардан астам жерге жетті. Жексенбі күнгі мәлімет бойынша, өртті оқшаулау мүмкін болмады. Жалынның тез тарауына күшті жел, ауаның төмен ылғалдылығы және жоғары температура әсер етіп отыр.
Өртті сөндіруге жүздеген өрт сөндіруші, құтқарушы және құқық қорғау органдарының қызметкері жұмылдырылды. Оқиға орнында арнайы жасақтар мен техника жұмыс істеп жатыр. Әуеден тікұшақтар тартылған. Мамандар өрт ошағы мен елді мекендердің арасына қорғаныс жолақтарын салуға тырысуда.
Невада штатының губернаторы Джо Ломбардо Рино қаласы орналасқан Уошо округінде төтенше жағдай жариялады. Жергілікті қызметтерге көмек көрсету үшін Ұлттық ұланның 60 әскери қызметкері мен екі тікұшағы жіберілді.
Өрт салдарынан алты адам зардап шекті. Олардың үшеуі – жергілікті тұрғындар, тағы үшеуі – төтенше жағдайлар қызметінің мамандары. Қаза тапқандар туралы ақпарат түскен жоқ.
Жалын бірқатар ғимаратты зақымдап, кейбірін толықтай шарпыған. Алайда шығынның нақты көлемі әлі анықталған жоқ. Қауіптің сейілмеуіне байланысты мамандар жекелеген аумақтарды толық тексере алмай отыр.
Он мыңға жуық үй мен кәсіпорын электр қуатынсыз қалды. Қосымша қауіптің алдын алу үшін кейбір электр желілері төтенше жағдайда әдейі ажыратылған.
Эвакуацияланған тұрғындар үшін уақытша орналастыру орындары ашылды. Үй жануарлары мен малды қауіпсіз жерге жеткізуге арналған арнайы алаңдар да қарастырылған. Риноның солтүстігіндегі медициналық мекемелердің бірі қауіпсіздік мақсатында науқастарды басқа ауруханаларға көшірді.
Рино–Тахо халықаралық әуежайы эвакуация аймағынан тыс жерде орналасқан және коммерциялық рейстерді қабылдауды жалғастырып жатыр. Дегенмен тұрғындардың қауіпті аумақтардан жаппай шығуына және жолдардың бір бөлігін құтқару қызметтерінің пайдалануына байланысты көлік қозғалысы қиындаған.
Алдын ала тергеу өрттің адам әрекетінен шығуы мүмкін екенін көрсетіп отыр. Алайда жалынның нақты неден тұтанғаны мен оқиғаның мән-жайы әзірге анықталған жоқ.
Жергілікті билік тұрғындарды жабық аумақтарға оралмауға және ресми хабарламаларды бақылауға шақырды. Жел бағытының өзгеруіне байланысты эвакуация аймақтарының шекарасы қысқа уақыт ішінде ауысуы мүмкін.
