АҚШ президенті Дональд Трамп үшінші президенттік мерзімге сайлауға түсу мүмкіндігі туралы айтып, әлемдік БАҚ-тың назарын қайта аударды, деп хабарлайды SHYNDYK.KZ. Мұндай атышулы мәлімдемеге оның бұрынғы сайлау нәтижелеріне қатысты ескі шағымдары себеп болған.
«Менің ойымша, қайтадан сайлауға түсуге құқығым бар, өйткені олар алаяқтық жасады. Олар сол сайлауды бұрмалады», — деген Трамп Джо Байден жеңіске жеткен 2020 жылғы сайлаудың әділетсіз өткенін тағы да алға тартты.
Айта кетейік, АҚШ Конституциясына енгізілген 22-ші түзету бір адамды екі реттен артық президент қызметіне сайлауға қатаң тыйым салады. Дональд Трамп бұл қызметті 2017–2021 жылдары атқарған және Ақ үйге 2025 жылдың қаңтарында қайта оралған. Осылайша, оның 2028 жылғы сайлауға үшінші мерзімге қатысуы елдің қолданыстағы Негізгі заңына тікелей қайшы келер еді.
