Ақбота Серіктің айтуынша, бұрынғы күйеуі оған бірнеше жыл бойы қоқан-лоқы көрсетіп, зорлық-зомбылық жасаған. Оқиғалардың бірінде ол есікті бұзып кірмек болып, өлтіретінін айтып қорқытқан. Жәбірленуші бұл жай ғана тұрмыстық жанжал емес, оның өміріне төнген шынайы қауіп екенін айтады — қолында бейнежазбалар, сот-медициналық сараптама қорытындылары мен басқа да құжаттар бар.
Әйел бұрынғы жұбайының туыстары куәгерлерге қысым жасап жатқанын алға тартты. Сондай-ақ ол ер адамның депутаттардың бірінің бауыры екенін айтып, тергеудің әділдігіне күмән келтіретінін жеткізді. Оны алаңдататын басты мәселе — барлық дәлелдер бола тұра, қылмыстық істің екі жылға жуық уақыт бойы сотқа жолданбауы.
Ақбота Серік лауазымды тұлғалардың әрекетін тексеруді және істің объективті қаралуын қамтамасыз етуді талап етіп, ҚР Ішкі істер министрі Ержан Сәденовке үндеу жолдады.










