Жоспардан тыс тексеруге жолаушылардың бірінің шағымы себеп болған. Алматы қаласының Сауда және тұтынушылардың құқықтарын қорғау департаменті бейінді комитетпен және астаналық әріптестерімен бірлесіп, әуе компаниясының ішкі ережелерін зерделеп, клиенттердің құқығын шектейтін бірқатар нормаларды анықтады.
Атап айтқанда, заңбұзушылықтар мына мәселелерге қатысты болды:
-
тасымалдау шарттарын біржақты өзгерту және әуе компаниясының жауапкершілігін шектеу;
-
жекелеген алымдарды заңсыз өндіріп алу және билет ақшасын қайтару мүмкіндігін шектеу;
-
клиенттерді ақпараттандыру талаптарын бұзу және жазбаша шағым беру тәсілдерін шектеу.
Тексеру қорытындысы бойынша тасымалдаушыға заңбұзушылықтарды жою туралы нұсқама берілгенімен, FlyArystan ведомствоның бұл әрекетін сотта даулауға тырысты. 21 шілдеде Алматының мамандандырылған ауданаралық әкімшілік соты әуе компаниясының талап арызын қанағаттандырудан бас тартты, ал апелляциялық инстанция бұл шешімді өзгеріссіз қалдырды.
Осылайша, сот тұтынушылардың құқықтарын қорғау органдарының авиациялық қызмет көрсету саласын бақылау өкілеттігін растады: әуе компанияларының ішкі ережелері жолаушылардың заңмен кепілдендірілген құқықтарын шектей алмайды.










