Тиісті қаулылардың жобалары туралы Орталық сайлау комиссиясы төрағасының орынбасары Мұхтар Ерман баяндады. Оның айтуынша, жоғары өкілді органның жаңа құрамына бес саяси партияның өкілдері енді.
Депутаттық мандаттар мынадай тәртіппен бөлінді:
- «Әділет» партиясы – 110 депутат;
- «Ауыл» партиясы – 10 депутат;
- Respublica партиясы – тоғыз депутат;
- Жалпыұлттық социал-демократиялық партия – сегіз депутат;
- Қазақстанның «Ақ жол» демократиялық партиясы – сегіз депутат.
Осылайша, Құрылтайдағы 145 орынның 110-ы «Әділет» партиясына берілді. Қалған 35 мандат төрт саяси партия арасында бөлінді.
ОСК төрағасы Нұрлан Әбдіров «Қазақстан Республикасының Құрылтайы және оның депутаттарының мәртебесі туралы» Конституциялық заңның 44-бабына сәйкес, депутаттардың өкілеттігі Орталық сайлау комиссиясы тіркеген сәттен басталатынын еске салды.
Қаулылар қабылданғаннан кейін тіркелген депутаттар өз өкілеттіктерін ресми түрде жүзеге асыруға кірісті.
Нұрлан Әбдіров Құрылтайдың заң шығару билігін жүзеге асыратын елдің жоғары өкілді органы екенін атап өтті. Оның айтуынша, депутаттар тікелей сайлау құқығы негізінде сайланған, ал сайлау науқаны заңнама талаптарына сәйкес өткен.
«Депутаттық мандат – халықтың сенімі мен таңдауының нәтижесі. Ал Құрылтай депутатының мәртебесі әрқайсыңызға ел мен халқымыздың алдында үлкен жауапкершілік жүктейді», – деді Нұрлан Әбдіров.
ОСК төрағасы жаңа депутаттық құрамды заң қабылдау және азаматтардың мүддесін білдіру кезінде өздеріне жүктелген жауапкершілікті ескеруге шақырды.
Депутаттарды тіркеу сайлау қорытындысы шығарылып, партиялар арасында мандаттар бөлінгеннен кейінгі Құрылтайдың жаңа құрамын қалыптастырудың қорытынды құқықтық кезеңі болды.
Отырыс соңында Нұрлан Әбдіров депутаттарға куәліктері мен омырауға тағатын белгілерін табыстады.
