Ведомствоның мәліметінше, қала тұрғыны әлеуметтік желідегі парақшасына үгіт-насихат сипатындағы жазба жариялаған. Қадағалаушы орган араласқаннан кейін ол кінәсін мойындап, жазбаны өшірген.
Бас прокуратура сайлау өтетін күні қандай да бір үгіт жүргізуге заңмен тыйым салынғанын еске салды. Бұл талап әлеуметтік желілер мен басқа да интернет-ресурстарда жарияланатын материалдарға да қатысты.
Сондай-ақ толтырылған сайлау бюллетенін фотоға немесе видеоға түсіріп, оны көпшілікке таратуға болмайды. Мұндай әрекеттер заңда көзделген жауапкершілікке әкеп соғуы мүмкін.
Ведомство азаматтарды сайлау заңнамасының талаптарын сақтауға және үгіт ретінде бағалануы ықтимал материалдарды жарияламауға шақырды.
