SHYNDYK.KZ редакциясының дереккөздері хабарлағандай, жоғары лауазымды басшыларды ҚР ҰҚК Сыбайлас жемқорлыққа қарсы іс-қимыл қызметінің қызметкерлері ұстауы мүмкін. Екі басшының да уақытша ұстау изоляторына қамалғаны айтылуда.
Алдын ала ақпарат бойынша, ҚТЖ басшысы Елжас Отыншиев елордадағы Ақмешіт көшесі, 1 мекенжайында орналасқан «Танжир» лаундж-барында ұсталған болуы мүмкін, сондай-ақ Нұрлан Жақыповқа қатысты да жедел іс-шаралар жүргізілген. Дереккөздер істің аса ірі мөлшерде пара алуға оқталу (ҚР ҚК 24-бабының 3-бөлігі, 366-бабының 4-бөлігі) баптары бойынша тергеліп жатқанын атап өтті. Сонымен қатар, күдіктілердің бірінің тұрғылықты жері бойынша тінту жүргізілуі мүмкін екені хабарланды.
Қазіргі уақытта мемлекеттік органдар немесе ұлттық компаниялар тарапынан ресми растау жоқ. SHYNDYK.KZ редакциясы жағдайды анықтау үшін құзыретті ведомстволарға және «Самұрық-Қазына» қорына ресми сауалнама жолдады. Ақпарат нақтылануда.
