Экология министрлігінің мәліметінше, рейтингті түзу барысында сарапшылар туристердің пікірлерін, тәжірибелі саяхатшылардың ұсыныстарын, журналистік зерттеулер мен ашық дереккөздердегі ақпараттарды ескерген. Қорытынды тізімге әлемнің 46 мемлекетінен бірегей табиғи орындар енген.
Шарын шатқалы өзінің ауқымдылығымен және ерекше бедерімен танымал. Табиғи ескерткіштің Шарын өзенін бойлай ұзындығы 154 шақырымды құрайды, ал тік жартастардың биіктігі кей жерлерде 300 метрге дейін жетеді. Ғалымдардың бағалауынша, мұндағы кейбір тау жыныстарының жасы шамамен 12 миллион жылды құрайды.
Келушілер арасында ең танымал орындардың бірі — әйгілі «Қамалдар аңғары». Мұнда ғасырлар бойы соққан жел мен су эрозиясының әсерінен жартастар зәулім мұнаралар мен қамал қабырғаларына ұқсас ғажайып пішінге ие болған. Сонымен қатар, ұлттық парк аумағында мұз дәуірінен бері аман сақталып қалған бірегей реликті шаған тоғайы өседі.
Халықаралық деңгейдегі жоғары мойындаудың белгісі ретінде The Worldworthy ұйымдастырушылары Шарын мемлекеттік ұлттық табиғи паркінің басшылығына ресми лауреат сертификатын табыстады.
