Жергілікті БАҚ мәліметінше, Никосиядағы Metropol Market супермаркетінде пышақпен жасалған шабуыл салдарынан Қазақстанның 22 жастағы азаматшасы ауыр жарақат алды.
Оқиға 3 тамыз күні сағат 11:45 шамасында болған. Ер адам алдымен бойжеткенге шабуыл жасап, содан кейін өзін-өзі жаралаған. Екеуі де доктор Бурхан Налбантоглу атындағы мемлекеттік ауруханасына жеткізілді. Қазақстандық азаматшаның жағдайы өте ауыр екені айтылуда.
Жергілікті полиция шабуылдың себебі әзірге белгісіз екенін мәлімдеді.
Қазақстанның Сыртқы істер министрлігі бұл оқиғадан хабардар екенін растады. Қазіргі уақытта дипломаттар оқиғаның мән-жайын анықтап, жергілікті құқық қорғау органдарымен тұрақты байланыста отыр. Жағдай министрліктің қатаң бақылауына алынды.
Алайда кейінірек бұл істе маңызды мән-жайлар нақтыланды. SHYNDYK.KZ редакциясы анықтағандай, бойжеткен Қазақстан азаматшасы емес. Отандық СІМ мәлімдегендей, Кипр тарапы деректерді тексергеннен кейін, зардап шегуші расымен де еліміздің тумасы, бірақ қазіргі уақытта Қырғыз Республикасының азаматшасы екендігі анықталды.
