Басшылықты ауыстыру туралы шешімді Apple директорлар кеңесі бірауыздан мақұлдады. Тим Кук компанияда атқарушы төраға ретінде жұмысын жалғастырып, жекелеген мәселелерді шешуге, соның ішінде әр елдің билік өкілдерімен өзара іс-қимылға қатысады. Алдағы кадрлық өзгерістер туралы бұған дейін Apple компаниясының баспасөз қызметі хабарлаған.
Тим Кук Apple компаниясына 1998 жылы қосылды. 2011 жылғы тамызда компанияның негізін қалаушылардың бірі Стив Джобстың орнына бас директор болып тағайындалды.
Ол басшылық еткен кезеңде Apple құрылғылар мен цифрлық сервистер желісін едәуір кеңейтті. Нарыққа Apple Watch, AirPods және Apple Vision Pro шығарылып, Apple Pay, Apple Music, Apple TV және iCloud сервистері дамыды.
Сервистік бизнес жеке бағытқа айналып, оның жылдық көлемі 100 миллиард доллардан асты. Кук басқарған кезеңде Apple компаниясының кірісі екі есеге жуық өсті. Компания нарықтық капиталдандыру көрсеткіші бойынша әлемдегі ең ірі корпорациялардың қатарына енді.
Apple компаниясының жаңа бас директоры Джон Тернус болмақ. Ол компанияда 2001 жылдан бері жұмыс істейді. Тағайындалғанға дейін аппараттық қамтамасыз етуді әзірлеу жөніндегі аға вице-президент қызметін атқарып, iPhone, iPad, Mac, Apple Watch және AirPods құрылғыларын жасауға жетекшілік етті.
Қызметіне кіріскеннен кейін Тернус Apple директорлар кеңесінің құрамына да енеді. Ол технология нарығында, соның ішінде жасанды интеллект саласында бәсеке күшейген кезеңде компанияны басқармақ.
