Салтанатты кездесуге халықаралық олимпиадалардың 21 жеңімпазы мен жүлдегері, сондай-ақ оларды жарысқа дайындаған ұстаздар мен тәлімгерлер шақырылды. Қазақстан құрамасы алты алтын, 11 күміс және төрт қола медаль иеленген.
Жас зияткерлер физика, химия, биология, математика, информатика, география және лингвистика пәндері бойынша өткен халықаралық олимпиадаларда жүлделі орындарға ие болды.
Мемлекет басшысы жеңімпаздарды құттықтап, олардың табысы Қазақстанның халықаралық білім кеңістігіндегі беделін арттыратынын атап өтті. Президент әрбір медальдың артында табанды еңбек, темірдей тәртіп пен мықты мінез тұрғанын айтты.
Биыл қазақстандық оқушылар 44 халықаралық олимпиада мен ғылыми байқауға қатысты. Олар мыңнан астам медаль жеңіп алды, соның 200-ден астамы – алтын. Қасым-Жомарт Тоқаев Халықаралық физика олимпиадасындағы ерекше нәтижеге жеке тоқталды. Бұл додаға Қазақстан атынан қатысқан бес оқушының барлығы алтын медаль иеленді.
Президент болашақта бүгінгі жүлдегерлердің ғалым, инженер және білікті маман болып қалыптасатынына сенім білдірді. Оның айтуынша, олар жаңа технологиялар жасап, Қазақстанның дамуына және әлемдік ғылымның өркендеуіне үлес қоса алады.
Қасым-Жомарт Тоқаев жаһандық бәсеке жағдайында білім, ғылым және инновация ел дамуының негізгі тетіктері екенін атап өтті. Ол дарынды жастарды цифрлық өзгерістер мен жасанды интеллект саласының көш басында болуға шақырды.
Мемлекет басшысы оқушыларды халықаралық жарыстарға дайындаған педагогтер мен тәлімгерлерге де алғыс айтты. Президент дарынды балалардың қабілетін шыңдайтын мамандар мемлекет тарапынан лайықты қолдау көруі қажет екенін жеткізді.
Кездесу соңында алтын, күміс және қола медаль иегерлеріне тиісінше 1500, 1000 және 500 айлық есептік көрсеткіш мөлшеріндегі ақшалай сыйлық сертификаттары табысталды. Ал жүлдегерлерді дайындаған ұстаздар мен тәлімгерлер мемлекеттік наградалармен марапатталды.
