Көпшілікті толғандырған басты сауалдардың бірі – Қасым-Жомарт Тоқаевтың келесі президент сайлауына қатысуы. Конституциялық соттың 2026 жылғы 7 шілдедегі қаулысына сәйкес, жаңа Конституция Президентке өз кандидатурасын қайта ұсынуға мүмкіндік береді.
Алайда Мемлекет басшысы алдағы жоспары туралы нақты жауап берген жоқ. Ол мұндай болжам жасауға әлі ерте екенін айтып, бұл мәселеге қатысты ойын 2027 жылы анығырақ жеткізуі мүмкін екенін мәлімдеді.
Андрей Чеботарёвтің пікірінше, Тоқаевтың сайлауға қайта қатысу мүмкіндігін қабылданып қойған шешім деп қарастыруға болмайды. Бұл ел ішіндегі немесе сыртқы қауіп-қатер күшейген жағдайда қажет болуы ықтимал саяси мүмкіндік. Ал қазіргі белгісіздік Президентке кейінгі шешімін қалыптасқан жағдайға қарай қабылдауға жол ашады.
Тағы бір маңызды мәселе – вице-президенттің тағайындалуы. Қасым-Жомарт Тоқаев кандидаттың есімі алдағы он күн ішінде белгілі болатынын айтты. Саясаттанушы бұл шешім Құрылтайдың алғашқы сессиясы ашылған кезде жариялануы мүмкін екенін жоққа шығармайды.
Сарапшылар мен бұқаралық ақпарат құралдары ықтимал үміткерлер қатарында Мәулен Әшімбаев пен Ерлан Қариннің есімдерін атап жүр. Дегенмен Чеботарёв ресми шешімді күтуге шақырды. Өйткені Мемлекет басшысының таңдауы көпшілік күтпеген тұлғаға түсуі де мүмкін.
Құрылтай жасақталғаннан кейін Үкімет құрамында да өзгерістер болады. Жаңа өкілді орган жұмысын бастаған соң Үкімет өз өкілеттігін тоқтатуға тиіс. Саясаттанушының пайымдауынша, осы рәсім Президентке Үкімет басшылығын қоса алғанда, министрлер құрамын едәуір жаңартуға мүмкіндік береді.
Қасым-Жомарт Тоқаев қазіргі Үкіметтің жұмысына оң баға бергенімен, бірқатар кадрлық өзгерістің болатынын айтты. Президент мұны елді жаңғырту бағытын жалғастыру, нарық талаптарына бейімделу және әлемдегі бәсекенің күшеюіне байланысты жаңа міндеттермен түсіндірді.
Андрей Чеботарёв Мемлекет басшысының болашақ депутаттарға қойған талаптарына да назар аударды. Президенттің пікірінше, Құрылтай мүшелері қабылданатын заңдардың сапасына, сайлауалды уәделердің орындалуына және партиялық бағдарламалардың жүзеге асуына жауапты болуы керек.
Осылайша, сайлаудан кейін Қазақстанның саяси өмірінде бірнеше маңызды шешім қабылданбақ. Құрылтайдың жаңа құрамы жасақталып, вице-президент тағайындалғаннан және Үкіметті жаңарту басталғаннан кейін алдағы саяси бағыт айқындала түспек.
