Мемлекет басшысы вице-президент лауазымының Конституцияда бекітілгенін және жаңартылған мемлекеттік басқару жүйесінде ерекше орын алатынын атап өтті.
Кездесу барысында Президент Ерлан Қариннің алдына бірқатар нақты міндет қойды. Атап айтқанда, вице-президентке мемлекеттік саясаттың негізгі мәселелері бойынша Құрылтаймен, Үкіметпен және басқа да мемлекеттік органдармен өзара іс-қимыл кезінде Мемлекет басшысының ұстанымын білдіру тапсырылды.
Бұл жұмыс негізгі билік институттары арасындағы іс-қимылдың үйлесімділігін қамтамасыз етуге және Президент тапсырмаларының уақтылы орындалуына ықпал етеді деп күтіліп отыр.
Конституцияға сәйкес вице-президентті Құрылтай депутаттары жалпы санының көпшілігі келіскен жағдайда Мемлекет басшысы тағайындайды. Оның өзге өкілеттіктерін де Президент айқындайды.
Вице-президент өз міндетін атқару кезінде өкілді органның депутаты бола алмайды. Сондай-ақ оған басқа ақылы қызмет атқаруға, кәсіпкерлікпен айналысуға және саяси партияның мүшесі болуға тыйым салынады.
Бұған дейін Ерлан Қариннің кандидатурасын Құрылтай депутаттары қолдап, кейін Қасым-Жомарт Тоқаев оны Қазақстанның вице-президенті қызметіне тағайындаған еді.
Оған дейін Ерлан Қарин Президент Әкімшілігі басшысының бірінші орынбасары болды. Әр жылдары Мемлекеттік кеңесші, Мемлекеттік хатшы, Президенттің көмекшісі және кеңесшісі қызметтерін атқарды.
