Түркі мемлекеттерінің Парламенттік Ассамблеясы миссиясының басшысы Осман Местен байқаушылардың сайлау учаскелері ашылған таңғы сағат 07:00-ден дауыс беру аяқталған 20:00-ге дейін жұмыс істегенін хабарлады.
Оның айтуынша, сайлау тыныш әрі қолайлы жағдайда өткен. Миссия өкілдері жаңа бір палаталы Парламент – Құрылтай депутаттарын алғаш рет сайлауды ел үшін тарихи маңызы бар оқиға деп атады.
«Біз мұны Қазақстан Республикасы мен бүкіл Қазақстан халқы үшін тарихи оқиға деп санаймыз», – деді Осман Местен.
ТҮРКПА миссиясы Орталық сайлау комиссиясы мен өңірлік сайлау комиссияларының жұмысын ерекше атап өтті. Байқаушылар әйелдердің, жастардың және қозғалысы шектеулі азаматтардың сайлауға қатысуына жасалған жағдайға оң баға берді.
Дауыс беру қорытындысына Шанхай ынтымақтастық ұйымының байқаушылар миссиясы да баға берді. ШЫҰ Бас хатшысының орынбасары Т. Р. Мидхун сайлаушылардың жоғары белсенділігін және учаскелік сайлау комиссияларының кәсіби жұмысын атап өтті.
Оның сөзінше, дауыс беру тыныш жағдайда әрі ұйымдасқан түрде өткен. Байқаушылар сайлау нәтижесіне ықпал етуі немесе оның заңдылығына күмән келтіруі мүмкін заң бұзушылықтарды тіркемеген.
«Миссия Құрылтай депутаттарының сайлауын ашық, сенімді және демократиялық өтті деп таниды», – деді Т. Р. Мидхун.
ШЫҰ өкілдері сайлау барысында Қазақстан заңнамасы мен елдің халықаралық міндеттемелері сақталған деген қорытындыға келді. Миссия әйелдер мен жастардың белсенділігіне де назар аударды.
ШЫҰ байқаушылар миссиясының құрамына алты мемлекеттен 17 өкіл кірді. Олар Астана қаласы мен Ақмола облысында жұмыс істеп, барлығы 102 сайлау учаскесіне барды.
