ҚР ІІМ Ұлттық ұланына қарасты әскери бөлімдердің аумағында 36 сайлау учаскесі жұмысын бастады. Әскери қызметшілер Құрылтай депутаттарын сайлауда қызмет орны бойынша дауыс беріп жатыр, деп хабарлайды SHYNDYK.KZ.
Алғашқылардың бірі болып Қазақстан Республикасы Ішкі істер министрінің орынбасары – Ұлттық ұланның Бас қолбасшысы, генерал-лейтенант Ансаған Балтабеков дауыс берді. Ол таңғы сағат 6:00-де елордадағы 5573 әскери бөлімінің аумағында орналасқан №266 сайлау учаскесіне келді.
Дауыс беруге офицерлер, келісімшарт бойынша және мерзімді әскери қызмет атқарып жүрген сарбаздар, олардың отбасы мүшелері мен Ұлттық ұлан ардагерлері қатысып жатыр. Көптеген жас ұландық сайлауда алғаш рет дауыс берді. Кейбір әскери қызметшілер сайлау учаскесіне туған күнінде келген.
Ұлттық ұлан қоғамдық тәртіп пен қауіпсіздікті қамтамасыз ету міндетін де жалғастырып жатыр. Күн сайын еліміздің 21 қаласында 7 мыңнан астам әскери қызметші қызмет атқарады.
Ұландықтар қоғамдық тәртіп пен қауіпсіздікті сақтау шараларын сайлау күні де, дауыс беру аяқталғаннан кейін де жалғастырады.
