Ұлытау облысында марганец кенішін заңсыз игеру ісі тергеліп жатыр. Тергеу мәліметтеріне сүйенсек, жұмысы тоқтаған карьер аумағында іс жүзінде тау-кен байыту кешені құрылған.
Бұл әрекет жерді қалпына келтіру сылтауымен жүзеге асырылған деп болжануда. Ол үшін арнайы карьерлік техника, сондай-ақ өндірілген кенді ұсақтайтын және жуатын жабдықтар пайдаланылған.
Алынған шикізаттан тауарлық концентрат өндірілген. Оны Қазақстаннан тыс жерлерге тұрақты түрде шығарып тұру үшін теміржол тұйығы жалға алынып, сол жерден өнім көршілес елдерге жіберіліп отырған.
Тергеу материалдарына сәйкес, осы жолмен жалпы құны 1 миллиард теңгеден асатын 23 мың тоннадан астам өнім сатылған.
Заңсыз жұмыстар қоршаған ортаға да айтарлықтай зиян келтірді. Алдын ала есептеулер бойынша, тек бүлінген жерлерді қалпына келтірудің өзіне 150 миллион теңгеден астам қаражат қажет.
Қазіргі уақытта тергеу амалдары жалғасуда. Істің басқа да мән-жайы мен бұл қылмысқа қатысы болуы мүмкін тұлғалар анықталып жатыр.
