Әйелдің қазасы туралы ақпарат оның құрбысымен жазысқан соңғы хаттарының скриншоттары жарияланғаннан кейін қоғамда үлкен резонанс тудырды. Осы хаттарға қарағанда, Мадияр есімді күйеуімен арадағы жанжалға кішкентай балаға сатып алынған «Барни» бисквиті себеп болуы мүмкін. Марқұм (желіде оны Мадина деп атайды) бір печеньені жеп қойғанын, сол үшін күйеуі оған қатаң шүйліккенін жазған.
Жарияланған хабарламалардағы әйелдің өз сөзіне сүйенсек, ауызша басталған ұрыс қол жұмсауға ұласқан: ол күйеуінің басынан ұрғанын мәлімдеген. Сондай-ақ, хат алмасу барысында енесінің де бұл жағдайға араласып, келініне ұрысқаны айтылады. Хатта көрсетілгендей, кезекті ұрыс-керіс кезінде күйеуі оған заттарын жинап, үйден кетуді бұйырған.
Тығырыққа тірелген жас ана құрбысына заттарын жинап жатқанын және ажырасуға бекінгенін айтып, одан 15 мың теңге қарыз сұраған. Алайда құрбысында ондай қаражат болмаған. Осыдан кейін хат алмасу үзіліп, тек құрбысының: «Мадина, неге бұлай істедің?» деген үрейлі хабарламалары мен жауапсыз қоңыраулары ғана қалған.
Айта кету керек, қазіргі уақытта орын алған оқиғаның барлық мән-жайы, сондай-ақ отбасындағы жанжал мен қайғылы жағдайдың тікелей байланысы ресми түрде расталмаған және ешкімнің кінәсі дәлелденбеген. Құқық қорғау органдары барлық фактілерді мұқият тексеріп жатыр. Полиция аталған факті бойынша ҚР Қылмыстық кодексінің 105-бабы («Өзін-өзі өлтіруге дейін жеткізу») негізінде сотқа дейінгі тергеп-тексеру жұмыстары басталғанын мәлімдеді. Болған жайттың нақты себептерін тергеу анықтайтын болады.
