Түнгі сағат үш шамасында «102» арнасына Алматы – Өскемен тасжолында жол-көлік оқиғасы болғаны туралы хабарлама түскен. Куәгерлердің айтуынша, апатқа ұшыраған көліктердің бірі соқтығысқаннан кейін оқиға орнынан ізін суытпақ болған.
SHYNDYK.KZ хабарлағандай, осыдан кейін патрульдік полиция қызметкерлері жедел түрде қуғындауды бастады. Тәртіп сақшылары Қонаев қаласы бағытында жүйткіп бара жатқан Nissan Cefiro маркалы автокөлігін көп ұзатпай тоқтатып үлгерген.
Көлік тізгінінде Ескелді ауданының 25 жастағы тұрғыны отырғаны белгілі болды. Алдын ала мәліметтерге сүйенсек, ер адам жолға шығар алдында ішімдік ішкен. Ол қауіпсіз қашықтықты сақтамай, өзімен маркалас тағы бір Nissan Cefiro көлігіне барып соғылған. Кейінірек жүргізілген медициналық сараптама оның мас күйде болғанын толық растады.
Бұдан бөлек, тергеу барысында тағы бір маңызды жайттың беті ашылды. Белгілі болғандай, ер адам бұған дейін жеті жыл мерзімге көлік басқару құқығынан айырылған екен. Ол қатаң тыйымға қарамастан, темір тұлпар тізгініне қайта отырған.
Қазіргі уақытта қашқын жүргізуші ұсталып, уақытша ұстау изоляторына қамалды. Аталған дерек бойынша тиісті тергеу амалдары жүргізіліп жатыр. Тәртіп сақшылары жүргізуші куәлігінен айырылған азаматтың мұндай құқықбұзушылықты қайталағаны үшін қылмыстық жауапкершілік қарастырылғанын қатаң ескертеді.
