Қостанай облысындағы Қостанай – Қарабұтақ тасжолында екі жеңіл автокөлік бетпе-бет соғылып, екі адам көз жұмды, тағы төрт адам жарақат алды. Жол апатына қатысты полиция сотқа дейінгі тергеуді бастады, – деп хабарлайды SHYNDYK.KZ.https://shyndyk.kz/kk/
Құзырлы органның мәліметінше, қайғылы оқиға Бейімбет Майлин ауданына қарасты Валерьяновка ауылының маңында болған. Мұнда Chery Cowin және Mazda 626 автокөліктері соқтығысқан.
Алдын ала мәлімет бойынша, Chery Cowin жүргізушісі қарсы бағыттағы жолаққа шығып кетіп, Mazda 626 көлігімен соғылған. Апат салдарынан Chery жүргізушісі мен оның бір жолаушысы оқиға орнында жан тәсілім етті. Осы көліктегі тағы үш адам мен Mazda жүргізушісі ауруханаға жеткізілді.
Қостанай облыстық полиция департаменті қазіргі уақытта тергеушілер апаттың толық мән-жайы мен себептерін анықтап жатқанын мәлімдеді. Тергеу қорытындысы бойынша тиісті процессуалдық шешім қабылданатын болады.
