«Әділет» партиясы 2026 жылғы 23 шілдеде «Әділетті болашақ үшін» сайлауалды бағдарламасын ұсынып, әділдік қағидатының мәнін ашып көрсетті. Бұл құжат экономика, әлеуметтік сала, мемлекеттік басқару және азаматтардың құқықтарын қорғау бағытындағы маңызды ұсыныстарды біріктіреді, деп хабарлайды SHYNDYK.KZ.
«Әділет» партиясы өзін мемлекетті әділдік, заңдылық, жауапкершілік, еңбекқорлық және прогресс қағидаттары негізінде құруға ниетті жаңа буынның саяси күші ретінде көрсетеді. Бағдарламада басты міндет – жаңа Конституцияда бекітілген қағидаттарды әрбір азаматтың шынайы өміріне айналдыру екені атап өтілген.
Құжатта бағдарламаның бірнеше тәсілді қолдана отырып әзірленгені айтылған. Атап айтқанда, партия QR-кодтар жүйесі арқылы азаматтардың ұсыныстарын жинады, бизнес өкілдері мен сарапшылар қауымдастығының қатысуымен стратегиялық сессиялар өткізді, әлеуметтанулық зерттеулердің нәтижелері мен еліміздің ақпараттық күн тәртібіне талдау жасады.
Сондай-ақ адамның жетістігі еңбекке, білімге және жауапкершілікке байланысты болатын «мүмкіндіктер экономикасын» қалыптастыруға баса назар аударылған. Ол үшін өңдеу өнеркәсібін дамыту, кәсіпкерлікті қолдау, агроөнеркәсіптік кешенді нығайту, жаңа жұмыс орындарын құру және ресурстарды өңірлер арасында әділ бөлуді қамтамасыз ету ұсынылады.
Құжат алдағы бес жылға есептелген және жеті стратегиялық мақсатты біріктіреді. Авторлардың ойынша, оларды іске асыру еліміздің жаңа даму моделіне өтуін қамтамасыз етуі тиіс. Осы мақсатта бағдарламада мемлекеттік саясаттың он негізгі бағыты айқындалған: заң мен тәртіп, тиімді институттар, қуатты өңірлер, әділ және бәсекеге қабілетті экономика, цифрлық мемлекет, әлеуметтік ынтымақтастық және атаулы қолдау, адам әлеуетіне басымдық беру, жаңа мәдениетті қалыптастыру және ұлттың ұйысуы, «Таза Қазақстан», сондай-ақ жауапты орта держава.
Бүгін партия сайлауалды науқанның белсенді кезеңіне өтті. Астанадағы Республикалық сайлауалды штабтың ашылуында партия төрағасы Айбек Дәдебай «Әділеттің» дайындық кезеңін аяқтап, еліміздің барлық өңірлерінде сайлаушылармен белсенді жұмысқа көшетінін мәлімдеді. Сондай-ақ партия өзінің «Әділетті болашақ үшін» сайлауалды бағдарламасын сайлаушыларға таныстыра бастады.
«Партияның сайлауалды бағдарламасы – нақты іс-әрекеттерге, айқын жоспарларға, дәйекті әрі батыл шешімдерге негізделген кешенді құжат. Оның негізіне уақытпен, тәжірибемен тексерілген және азаматтарымыздың қолдауына ие болған шынайы құндылықтар салынған. Бағдарламамыздың басты құндылығы – адам, оның әл-ауқаты, отбасы және өмір сүруіне лайықты жағдай жасау. Біз ағымдағы мәселелерді уақытша шешуге емес, еліміздің ұзақ мерзімді және жүйелі дамуына назар аударамыз. Бағдарламаны әзірлеуге азаматтардың өздері тікелей қатысып, олардың ұсыныстары мен бастамалары осы құжаттың негізіне айналғанын ерекше атап өткім келеді», – деп баса айтты Айбек Дәдебай.
Ел бойынша 20 өңірлік және 226 аумақтық штаб, сондай-ақ 30 мыңға жуық сенім білдірілген адам жұмысын бастады. Сайлау науқаны барысында партия 21 мыңнан астам іс-шара өткізуді, оның ішінде Қазақстанның барлық өңірлерінде еңбек ұжымдарымен, бизнес өкілдерімен, жастармен және қоғамдық ұйымдармен кездесулер ұйымдастыруды жоспарлап отыр.
Сайлауалды бағдарламаның толық мәтінін «Әділет» партиясының сайтынан оқи аласыздар.
Дайындаған: «Әділет» партиясының баспасөз қызметі. «Әділет» партиясы» ҚБ сайлау қорының қаражатынан төленді. Тапсырыс беруші: Н.Т. Мыңжасаров.
